တက္ကသိုလ် ကျောင်းသားများ သမဂ္ဂ (တကသ) ဘယ်ကစသလည်း
တက္ကသိုလ် ကျောင်းသားများ သပိတ်၊ ပထမ (၁၉၂၀)
ရန်ကုန် ကောလိပ်နှင့် ယုဒသန် ကောလိပ် ကျောင်းသား တို့က ဦးဆောင်၍ ၁၉၂၀ ပြည့်နှစ် တက္ကသိုလ် ဥပဒေ ကို ကန့်ကွက်သည့် သပိတ် ဖြစ်သည်။ ယင်းဥပဒေ မပြဋ္ဌာန်းမီ မြန်မာ နိုင်ငံ၌ ရှိသော ရန်ကုန် ကောလိပ်နှင့် ယုဒသန် ကောလိပ် တို့မှာ အိန္ဒိယ နိုင်ငံ ကာလကတ္တား တက္ကသိုလ်၏ လက်အောက်ခံများ ဖြစ်ကြသည်။ ထို့ကြောင့် မြန်မာ နိုင်ငံ အတွက် သီးသန့် တက္ကသိုလ် တခု ထူထောင် ပေးရန် မြန်မာ တိုင်းရင်းသား တို့က မကြာခဏ တောင်းဆို ခဲ့ကြသည်။
သို့ဖြစ်၍ ရန်ကုန် ကောလိပ်နှင့် ယုဒသန် ကောလိပ် နှစ်ခုကို ပေါင်း၍ ရန်ကုန် တက္ကသိုလ် အဖြစ် တိုးမြှင့် ပေးသည့် ၁၉၂၀ ပြည့်နှစ် တက္ကသိုလ် ဥပဒေ (The University Act of 1920) ထွက်ပေါ် လာသည်။ ယင်း ဥပဒေကို ပြည်သူ လူထုက ဝေဖန်နိုင်ရန် ၁၉၂၀ ပြည့်နှစ် ဇွန်လ အတွင်း တိုင်းပြည်သို့ ကြေညာသည်။ နယ်ချဲ့ ဗြိတိသျှ အစိုးရသည် မလွဲမရှောင် သာ၍ သီးခြား တက္ကသိုလ် တည်ထောင်ရေး ရသောကြောင့် တက္ကသိုလ် ဥပဒေ တွင် အထက်တန်း ပညာ သင်ကြားရေးကို ကန့်သတ် ချုပ်ချယ် ထားသည့် အချက် များကို ထည့်သွင်း ထားသည်။ တက္ကသိုလ် တည်ထောင် ပေးသည်ကို ကြိုက်သော်လည်း ဥပဒေပါ အချက်အချို့ကို ပြည်သူ လူထုက မကျေနပ် ကြပေ။ ပြည်သူ လူထုက အထူး မကျေနပ်သည့် အချက် များမှာ ရန်ကုန် တက္ကသိုလ်သည် ကျောင်းအိပ် ကျောင်းစား နေရမည် ဆိုသည့် အချက်နှင့် တက္ကသိုလ် အုပ်ချုပ်ရေးနှင့် သင်ကြားရေးကို ဗြိတိသျှ လူမျိုး အရာရှိ များက ချုပ်ကိုင် ထားကြသည့် အချက် ဖြစ်သည်။ ထိုစဉ်က တက္ကသိုလ်တွင် ကျောင်းအိပ် ကျောင်းသား ဆိုလျှင် ငွေကြေး ချမ်းသာ သူနှင့် အရာရှိကြီး များ၏ သားသမီး များသာ နေနိုင်မည့် အခြေအနေမျိုး ဖြစ်သည်။ ထို့ကြောင့် အထက်တန်း ပညာကို လွယ်ကူစွာ မရနိုင် စေရန်၊ မတတ် မြောက်နိုင် စေရန် ပိတ်ပင် ထားသည်ဟု ယုံကြည် သောကြောင့် ကန့်သတ် ချုပ်ချယ်မှု များကို ပြင်ဆင် ပေးရန် တောင်းဆို ခဲ့ကြသည်။
မြန်မာ နိုင်ငံကို အင်္ဂလိပ် နယ်ချဲ့တို့ သိမ်းပိုက် ပြီးစ ကာလ များတွင် မြန်မာ နိုင်ငံ၌ မြန်မာစာကို ရေးတတ် ဖတ်တတ် သူမှာ လူ တရာလျှင် ၈၅ ဦးခန့် ရှိသော်လည်း ၁၉၂၀ ပြည့်နှစ် ကာလ တဝိုက် တွင်မူ မြန်မာစာ ရေးတတ် ဖတ်တတ်သူ ဦးရေမှာ တရာလျှင် ၃၅ ဦး ခန့်သာ ရှိတော့သည် အထိ လျော့နည်း ကျဆင်း သွားခဲ့ ရသည်။ ထိုသို့ မြန်မာ့ ပညာရေး လောက တခုလုံး ချွတ်ခြုံ ကျနေ ရသည့် အချိန်တွင် ထို တက္ကသိုလ် ဥပဒေ မူကြမ်းကို အင်္ဂလိပ် အစိုးရက ရေးဆွဲ ထုတ်ပြန် ခဲ့ခြင်း ဖြစ်သည်။ ထိုကြောင့် ပြည်သူ လူထုသည် လူထု အစည်းအဝေးပွဲ များဖြင့် လည်းကောင်း၊ ဆောင်းပါး များဖြင့် လည်းကောင်း တက္ကသိုလ် ဥပဒေ ပါ မကျေနပ် ချက်များ အပေါ် စစ်ဆေး ဝေဖန် တင်ပြ ခဲ့ကြသည်။ ဤသို့ အမျိုးမျိုး ကန့်ကွက်သည့် ကြားမှပင် ၁၉၂၀ ပြည့်နှစ် သြဂုတ်လ ၂၈ ရက်နေ့တွင် မြန်မာ နိုင်ငံ ဥပဒေပြု ကောင်စီမှ တက္ကသိုလ် ဥပဒေ ကို လက်ခံ အတည် ပြုခဲ့သည်။ ယင်းဥပဒေ စတင် အာဏာ တည်သည့် နေ့မှာ ၁၉၂၀ ပြည့်နှစ် ဒီဇင်ဘာလ ၁ ရက် ဖြစ်သည်။
ရန်ကုန် တက္ကသိုလ် ဥပဒေ စတင် အာဏာ တည်သည့်နေ့ နောက်နှစ် ရက်မြောက် ဖြစ်သော ၁၉၂၀ ပြည့်နှစ် ဒီဇင်ဘာလ ၃ ရက်နေ့တွင် ရန်ကုန် ကောလိပ်မှ ကျောင်းသားကြီး ၁၁ ဦး တို့သည် ရွှေတိဂုံ ရင်ပြင် စနေထောင့်၌ တွေ့ဆုံ၍ ရန်ကုန် တက္ကသိုလ် ဥပဒေ ကို သပိတ်မှောက်ရန် သစ္စာဆို အဓိဋ္ဌာန် ပြုကြသည်။ ယင်း ကျောင်းသားကြီး များမှာ -
၁။ ကေညီပိတ်
၂။ ထွန်းဝင်း
၃။ ဖေသိန်း
၎။ ဘခင်
၅။ ဘရှင် (သံတွဲ)
၆။ ဘရှင် (ထားဝယ်)
၇။ ဘဦး
၈။ ဘိုးကွန်း
၉။ လှတင်
၁၀။ မောင်ဧ
၁၁။ အောင်ဒင် - တို့ ဖြစ်ကြသည်။
အထက်ပါ ကျောင်းသား ၁၁ ဦးတို့ ၂ နာရီ ကျော်တိုင် အကြိတ်အနယ် ဆွေးနွေး ပြီးနောက် အောက်ပါ တို့ကို တညီတညွတ်တည်း ဆုံးဖြတ်ချက်များ အဖြစ် ချမှတ် ခဲ့သည်။
၁။ တက္ကသိုလ်ပင် ရှိနေလိမ့် ကစား ကျောင်းသားများ မရှိလျှင် အချည်းနှီးတည်း။ ရွှေကျောင်း ပြောင်ပြောင် ဝမ်းခေါင်ခေါင် တည်းဟု ယူဆကာ ရန်ကုန် တက္ကသိုလ် ဥပဒေ ကို ကန့်ကွက် တိုက်ဖျက်သည့် အနေနှင့် ရန်ကုန် တက္ကသိုလ် ကောလိပ်ကျောင်းနှင့် ယုဒသန် ကောလိပ်ကျောင်း နှစ်ကျောင်းကို သပိတ်မှောက် ကြရန်နှင့်။
၂။ ၁၉၂၀ ခုနှစ်၊ ဒီဇင်ဘာလ ၄ ရက် စနေနေ့၌ ထိုကောလိပ် ကျောင်း နှစ်ကျောင်းမှ ကျောင်းသား ပေါင်းစုံ အစည်းအဝေး တခု ခေါ်ယူ၍ နယ်ချဲ့ အစိုးရအား ဆန့်ကျင် သပိတ်မှောက် တိုက်ပွဲ ဆင်မည့် အကြောင်းကို တင်ပြ အဆုံးဖြတ် အတည် ပြုရန် တို့ပင် ဖြစ်သည်။
ထိုပထမ ဆယ့်တစ်ဦးမှာ ၁၉၂၀ ဒီဇင်ဘာ လ ၃ ရက် ရွှေတိဂုံ စေတီတော် ရင်ပြင် ပေါ်၌ ပထမဆုံး တွေ့ဆုံ၍ သပိတ် မှောက်ရန် ဆုံးဖြတ် ကြသူများ ဖြစ်ပြီး၊ ဒီဇင်ဘာလ ၄ ရက်နေ့ ဗဟန်း ဦးအရိယကျောင်း အစည်းအဝေးတွင် ခေါင်းဆောင် ၁၅ ဦး တိုးလာ ခဲ့ရာ အဆိုပါ ပုဂ္ဂိုလ်များမှာ (၁၂) ကိုလှစိန်၊ (၁၃) ကိုဘတင်၊ (၁၄) ကိုမြ (အာဇာနည် ခေါင်းဆောင်ကြီးသခင်မြ)၊ (၁၅) ကိုမြင့် (အမျိုးသားနေ့ သတ်မှတ်ရန် အဆိုပြု ခဲ့သူ) ၊ (၁၆) ကိုဖိုး ကျား (အမျိုးသားပညာဝန်)၊ (၁၇) ကိုစိုးဝင်း၊ (၁၈) ကိုဖိုးလတ်၊ (၁၉) ကိုထွန်းဖေ၊ (၂၀) ကိုဘဟန်၊ (၂၁) ကိုဘကျော်၊ (၂၂) ကိုလူဖေဝင်း (အငြိမ်းစား ညွှန်ကြားရေးဝန်၊ ရှေးဟောင်း သုတေသန)၊ (၂၃) ကိုမောင်ကို၊ (၂၄) အီးမောင်စိန်၊ (၂၅) အင်န်စီဆင်း၊ (၂၆) မစ္စတာဘို့စ် တို့ ဖြစ်ကြသည်။
ထိုကျောင်းသား အစည်းအဝေး ကြီးမှ အောက်ပါ တိုက်ပွဲဝင် ဆုံးဖြတ်ချက် များကို တညီတညွတ်တည်း ဆုံးဖြတ် ပြဌာန်း လိုက်ကြသည်။
၁။ ၁၉၂၀ ခုနှစ်၊ ဒီဇင်ဘာလ ၇ ရက်နေ့ အင်္ဂါနေ့၌ မြန်မာ လက်ထောက် ဘုရင်ခံ ဖုတ်တဈေ ဆာရယ်ဂျီနယ် ကရက်ဒေါက်သည် ရန်ကုန် တက္ကသိုလ် လာရောက်ပြီး သကာလ မြန်မာပြည်တွင် သီးသန့် ရန်ကုန် တက္ကသိုလ် ကျောင်းကြီး ဖွင့်ပြီးကြောင်း ကျေညာသော အခါ ရန်ကုန် တက္ကသိုလ်နှင့် ယုဒသန် ကောလိပ်၊ ထို ကောလိပ် ကျောင်းနှင့် ကျောင်းရှိ ကျောင်းသား ကြီးများ တို့က မိမိတို့ စာအုပ် များကို ပွေ့ပိုက်၍ ရန်ကုန် တက္ကသိုလ် ကျောင်းကို သပိတ်မှောက် တိုက်ပွဲ ဆင်နွဲ သည်ဟု အော်ဟစ် ခုန်ပေါက်ကာ ကျောင်းသားများ တညီတညွတ်တည်း ထွက်ခွာ လာကြရန်။
၂။ ဤသို့ဖြင့် သပိတ်မှောက် တိုက်ပွဲ ဆင်ပြီး ကာမှ ထို ရန်ကုန် တက္ကသိုလ် ဥပဒေ သည် မြန်မာ လူမျိုးများ အထက်တန်း ပညာ သင်ကြားရေး အတွက် တံခါးပိတ် ဝါဒ ကျင့်သုံး ထားသည့် နစ်နာ ချုပ်ချယ် ထားသော အချက်အလက်များ တို့ကို ပြန်လည် ပြုပြင် ပေးရန် ဗြိတိသျှ နယ်ချဲ့ ဗြူရိုကရက် အစိုးရသို့ အရေးဆို ဆောင်ရွက်ရန်နှင့်။
၃။ ပြုပြင်ပေးရန် တရားသော တောင်းဆို ထားသည့် အချက် များကို နယ်ချဲ့ တို့က ပြုပြင်၍ မပေး သမျှ ကာလ ပတ်လုံး ကျောင်းပြန်၍ မတက် ရောက်ကြရန် တို့ပင် ဖြစ်ပါသည်။
အထက်ပါ ကျောင်းသားကြီး များ၏ ဦးဆောင်မှုဖြင့် ရန်ကုန် ကောလိပ်နှင့် ယုဒသန် ကောလိပ် တို့မှ ကျောင်းသားများက ရန်ကုန် တက္ကသိုလ် ဥပဒေ ပါ မကျေနပ် ချက်များကို ကန့်ကွက်သည့် သပိတ်မှောက် ပွဲကို အခြေအနေ အကြောင်းကြောင်း အရ ၁၉၂၀ ပြည့်နှစ် ဒီဇင်ဘာ ၅ ရက်နေ့တွင် စောပြီး စတင် လိုက်ကြသည်။ ဗဟန်းရှိ ဆရာတော် ဦးအရိယ (ရွှေကျင်) ကျောင်းတိုက်မှာ သပိတ် စခန်း ဖြစ်သည်။ ကျောင်းသား ကိုယ်စားလှယ် ၂၆ ဦး ပါသော သပိတ်မှောက် ကော်မတီက သပိတ်ကို ကြီးကြပ် ပေးသည်။
ဒီဇင်ဘာလ ၈ ရက်နေ့တွင် သပိတ်မှောက် ကျောင်းသား များသည် အတွင်းဝန် ရုံးသို့ လှည့်လည် ကေ့းကြော် ဆန္ဒ ပြကြသည်။ ထိုအခါ ပညာမင်းကြီး မက်ဟန်းတားက မိမိ ရုံးခန်း ပြတင်းပေါက်မှ ကြည့်၍ ပြုံးလျက် “ဒါဟာ မကြာခင် ငြိမ်းသွားမယ် ကောက်ရိုး မီးကလေးပဲ” ဟု မှတ်ချက် ချခဲ့သည်။ မက်ဟန်းတား၏ ဟောကိန်းသည် တက်တက်ဆင်အောင် လွဲမှား ခဲ့ပေသည်။ ယင်း ကျောင်းသား သပိတ်မှ စတင် လောင်ကျွမ်း ခဲ့သော မီးသည် မြန်မာ နိုင်ငံ အပေါ် လွမ်းမိုး ခဲ့သော ဗြိသျှ နယ်ချဲ့ စနစ် အဆောက်အအုံအား အပြီး အတိုင် ဖုတ်ကျဉ်း သဂြိုလ်ရန် မြန်မာနိုင်ငံ အနှံ့ ပြန်နှံ့ ခဲ့သည်။ တက္ကသိုလ် ကျောင်းသားများ သပိတ်မှောက်ပြီး တပတ် အကြာတွင် ရန်ကုန်မြို့ နှင့်တကွ တနိုင်ငံ လုံးမှ အထက်တန်းနှင့် အလယ်တန်းကျောင်း အချို့လည်း ပါဝင် လာသဖြင့် အထွေထွေ ကျောင်းသား သပိတ်ကြီး ဖြစ်လာသည်။ အင်္ဂလိပ် နယ်ချဲ့ အစိုးရလည်း တုန်လှုပ် ခြောက်ခြား သွားပြီး၊ အိန္ဒိယရှိ အင်္ဂလိပ် ဘုရင်ခံချုပ်ထံ ၁၄ ရက် တပတ် အစီရင်ခံစာ တင်သွင်း ရာတွင် တက္ကသိုလ် သပိတ် မှောက်သည့် အရေးကို ထိထိရောက်ရောက် အရေးယူ နှိမ်နှင်းခြင်း မပြုလျှင် မြန်မာပြည်ကို လက်လွတ် ရလိမ့် မည်ဟု ရေးသား တင်သွင်း ခဲ့သည်။
သပိတ် အစတွင် ရန်ကုန် တက္ကသိုလ် ဥပဒေ ပါ ချို့ယွင်းချက်များ ပြင်ပေးရန် တောင်းဆိုလွှာကို ရန်ကုန် တက္ကသိုလ် အဓိပတိထံ သပိတ်မှောက် ကျောင်းသားထုက ၁၉၂၀ ပြည့်နှစ် ဒီဇင်ဘာ ၁၉ ရက်နေ့စွဲဖြင့် တင်ပြ ခဲ့ကြသည်။ သို့သော် နောက်ပိုင်း ရောက်သော် ကျောင်းသားထု၏ လိုလားချက် များကို လိုက်လျောသည် ဖြစ်စေ၊ မလိုက် လျောသည် ဖြစ်စေ နယ်ချဲ့ အစိုးရက တည်ထောင် ပေးသည့် တက္ကသိုလ်သို့ ဆက် မတက်ရန် အထိ ဆုံးဖြတ် ကြသည်။ နယ်ချဲ့ အစိုးရက ကျောင်းသား များကို အစုလိုက် အပြုံလိုက် ကျောင်းထုတ်သည့် နည်းဖြင့် ဖြိုခွဲ ကြည့်သည် မရ၊ ကျောင်းသား အများစုက ကျောင်းပြန် မတက်ဘဲ အမျိုးသား ကျောင်းများ တည်ထောင် ကြသည်။ ရန်ကုန် တက္ကသိုလ်သို့ လုံးဝ ပြန်မတက် ကြသည့် ရာသက်ပန် သပိတ်မှောက် သူများပင် ရှိခဲ့သည်။
တက္ကသိုလ် သပိတ်သည် အသွင်အပြင် အားဖြင့် တက္ကသိုလ် ဥပဒေ ပါ ချို့ယွင်းချက် များကို ဆန့်ကျင်သည့် သပိတ် ဖြစ်သော်လည်း အနှစ်သာရမှာ နယ်ချဲ့ အစိုးရနှင့် နယ်ချဲ့ စနစ်ကို ဆန့်ကျင် တော်လှန်သည့် သပိတ် ဖြစ်သည်။ ပညာရေး တောင်းဆိုချက်များ သက်သက်ဖြင့် သပိတ်ကြီး ရုတ်တရက် ပေါ်ပေါက် ခဲ့ရ သော်လည်း အခြေခံ အကြောင်းရင်းမှာ နယ်ချဲ့ အရင်းရှင် တို့၏ စိုးမိုး ချယ်လှယ်မှုကို လုံးဝ မကျေနပ် တော့သည့် အချက်ကြောင့် ဖြစ်သည်။ ဤ သပိတ်သည် မြန်မာ တိုင်းရင်းသား တို့က စနစ်တကျဖြင့် စည်းရုံး၍ နယ်ချဲ့ အစိုးရကို ပထမဆုံး ထိထိရောက်ရောက် တော်လှန်သည့် သပိတ် ဖြစ်သည်။ ထိုစဉ်က ဂျီစီဘီအေ ဦးအောင်သည့် ဝံသာနု လှုပ်ရှားမှုနှင့် ဆက်စပ် နေပြီး ထိုလှုပ်ရှားမှု၏ ရောင်ပြန် ဟပ်မှုလည်း ဖြစ်သည်။ ကျောင်းသားထုနှင့် ပြည်သူ တို့၏ ပေါင်းစည်းမှု ကိုလည်း တွေ့ရသည်။ ထို့ကြောင့် အမျိုးသားရေး လှုပ်ရှားမှု ဟုလည်း ဆိုနိုင်သည်။
တက္ကသိုလ် သပိတ်၏ လတ်တလော အကျိုး သက်ရောက်မှုမှာ အမျိုးသား ပညာရေး ကောင်စီ၊ အမျိုးသား ကောလိပ်နှင့် အမျိုးသား အထက်တန်း ကျောင်းများ ပေါ်လာခြင်း ဖြစ်သည်။ ထိုသို့ အမျိုးသား ပညာရေး စနစ် ပေါ်လာ၍ အမျိုးသား ယဉ်ကျေးမှုနှင့် မြန်မာ စာပေတို့ ပြန်လည် ရှင်သန် ဖွံ့ဖြိုး လာရုံမက မျိုးချစ် စိတ်လည်း ပို၍ ကြီးထား လာသည်။ နယ်ချဲ့ အစိုးရကို တော်လှန် ရမည် ဆိုသည့် ရဲစိတ်ကို မွေးပေးပြီး ရဲဆေး တင်ပေးသည့် သပိတ်လည်း ဖြစ်သည်။ သို့ဖြစ်၍ ပြည်သူ လူထုကို နိုင်ငံရေး မျက်စိ ဖွင့်ပေးသော သပိတ်ဟု ဆိုနိုင်သည်။ ဤသပိတ် အပြီးတွင် နိုင်ငံရေး အသိတရား ပိုမို နိုးကြား လာသောကြောင့် ဒိုင်အာခီ အုပ်ချုပ်ရေးထက် အဆင့်မြင့်သော ဟုမ်းရူး ခေါ် ကိုယ်ပိုင် အုပ်ချုပ်ရေး၊ ထို့နောက် လုံးဝ လွတ်လပ်ရေး အထိ တိုးတက် တောင်းဆို ခဲ့ကြသည်။ နောက်ပိုင်းတွင် တက္ကသိုလ် ဥပဒေ အချို့ကို နယ်ချဲ့ အစိုးရက မသိမသာ ပြုပြင် ပေးခဲ့ ရသည့် အကျိုးဆက် ကိုလည်း ရရှိ ခဲ့သည်။ ဤ သပိတ် မှောက်သည့် နေ့ကို အမျိုးသားနေ့ဟု သတ်မှတ်ပြီး အမျိုးသား အောင်ပွဲနေ့ အခမ်းအနား ကျင်းပ ပေးခြင်း အားဖြင့် မျိုးချစ်စိတ်ကို ဆက်လက် ရှင်သန် ကြီးထွား စေသည် နှင့်အမျှ နယ်ချဲ့ ဆန့်ကျင်ရေးနှင့် လွတ်လပ်ရေး လှုပ်ရှားမှု အရှိန်အဟုန်သည် ပို၍ မြင့်မား ခဲ့သည်။ ထို့ကြောင့် ရေရှည်တွင် လွတ်လပ်ရေး ရသည်ထိ အထောက်အကူ ပြုသည့် သပိတ်ကြီး ဖြစ်သည်။
၁၉၂၆ ခုနှစ်တွင် သူဌေး ဒေါက်တာ ဦးညိုက သမဂ္ဂ ဖွဲ့စည်း တည်ထောင်ရန် အတွက် ငွေသား တသိန်း ခုနှစ်သောင်း လှူဒါန်း ခဲ့သည်။ ၁၉၃၀၊ စက်တင်ဘာ ၁၂ ရက်နေ့တွင် အဆောင် ကျောင်းသားများ၊ နေ့ကျောင်းသားများ စုဝေး ညှိနှိုင်း ကြပြီး ကိုကျော်ခင်၊ ကိုတင့်ဆွေ၊ ကိုဘဂျမ်း တို့က တရား သူကြီး ဦးဘနှင့် တွေ့ဆုံပြီး သမဂ္ဂ စည်းမျည်း ရေးဆွဲရန် ကော်မတီ တခုကို ဖွဲ့စည်းခွင့် ရခဲ့ပေသည်။ စက်တင်ဘာလ ၂၀ ရက်နေ့တွင် ကျောင်းထု အစည်းအဝေးမှ တက္ကသိုလ် ကျောင်းသားများ သမဂ္ဂ တခု ဖွဲ့စည်းရန် ဆုံးဖြတ် ကြသည်။ ၎င်းနောက် အောက်တိုဘာ ကျောင်းပိတ်ရက် အတွင်း သမဂ္ဂ စည်းမျည်း များကို ရေးဆွဲ ကြသည်။ နိုဝင်ဘာ လဆန်းတွင် ရေးဆွဲ ပြီးစီးပြီး၊ နိုဝင်ဘာ ၂၄ ရက်နေ့တွင် လက်မှတ် ရေးထိုး၍ ကျောင်းသား ထုထံ ချပြကာ မှတ်ချက်များ တောင်းခံ ခဲ့သည်။
၁၉၃၁ ခုနှစ် ဇန်နဝါရီ လတွင် ကျောင်းသားထု စည်းဝေး ပွဲကြီးမှ တညီတညွတ်တည်း သဘောတူ ဆုံးဖြတ် ကြပြီး၊ အမှုဆောင် ၉ ဦးဖြင့် စတင် ဖွဲ့စည်း ခဲ့သည်။ ယင်း အမှုဆောင် အဖွဲ့သည် သမဂ္ဂ အဆောက်အဦ ကိစ္စ အပြင် သမဂ္ဂ စည်းမျဉ်း ဥပဒေ ဆက်ရေးဆွဲ ရန်နှင့် ပတ်သက်၍ တက္ကသိုလ် အာဏာပိုင် များနှင့် စေ့စပ် ဆွေးနွေးရန် အခွင့် အာဏာ ရှိလာ ခဲ့သည်။ ၁၉၃၁ ဇန်နဝါရီလ ၃၁ ရက်နေ့တွင် “ရန်ကုန် တက္ကသိုလ် ကျောင်းသားများ သမဂ္ဂ (တကသ)” ကို ဖွဲ့စည်း ခဲ့ကြသည်။
သမဂ္ဂ၏ ရည်ရွယ်ချက်များမှာ
၁။ လူမှု ဆက်ဆံရေး နယ်ပယ်၌ အစုအပေါင်းဖြင့် ကောင်းစွာ ဆောင်ရွက် နိုင်သော ဘဝကို ဖြစ်ထွန်း လာစေရန်။
၂။ မိမိကိုယ် မိမိ အားကိုး၍ လွတ်လပ်စွာ ဆောင်ရွက် နိုင်သော ဘဝကို ဖြစ်ထွန်း လာစေရန်။
၃။ တာဝန် ဝတ္တရား များကို သိတတ်သော စိတ်ဓာတ်များ ဖြစ်ပေါ် လာစေရန်။
၁၉၃၀ ပြည့်နှစ်မှ ၁၉၆၂ ခုနှစ် အထိ ခေတ်အဆက်ဆက်တွင် တကသ၊ ဥက္ကဌ အဖြစ် ဆောင်ရွက် ခဲ့ကြသူများ
၁။ ၁၉၃၀ - ၃၁ ဦးကျော်ခင် [B.Sc., B.L.] လွှတ်တော် ရှေ့နေကြီး။
၂။ ၁၉၃၁ - ၃၂ ဦးထွန်းစိန် [B.Sc., B.L.] လွှတ်တော် ရှေ့နေကြီး။
၃။ ၁၉၃၁ - ၃၂ ဦးဘိုးကူး D.S.I (3) မန်နေဂျာ။
၎။ ၁၉၃၂ - ၃၃ ဦးစံဖော်အောင် [M.A., B.L] စတီးဘရားသား ဝင်ကုန် ထွက်ကုန် ဌာန အုပ်ချုပ်ရေး။
၅။ ၁၉၃၃ - ၃၄ ဦးသိန်းမောင် [B.A., B.L] စတီးဘရားသား ဆန်ဌာန အုပ်ချုပ်ရေး။
၆။ ၁၉၃၄ - ၃၅ ဦးဖိုးအေး [B.Sc.Hons. (Rng.), Ph.D. (London). D.I.C.F.R (မိုးဇလ) (London) မိုးလေဝသ ညွှန်ကြားရေးဝန်။
၇။ ၁၉၃၅ - ၃၆ ဦးနု [B.A] ဝန်ကြီးချုပ်ဟောင်း။
၈။ ၁၉၃၆ - ၃၇ ဦးရာရှစ် [B.Sc., B.L] ဝန်ကြီးဟောင်း။
၉။ ၁၉၃၇ - ၃၈ (ပုဂံ) ဦးဘဂျမ်း B.A, B.L. ဝန်ကြီးဟောင်း၊ ရွှေတိဂုံ စေတီတော် ဘဏ္ဍာတော်ထိန်း လူကြီး၊ ကမ္ဘာအေး စေတီ ဘဏ္ဍာတော်ထိန်း လူကြီး၊ ဗုဒ္ဓ သာသန နုဂ္ဂဟ အဖွဲ့နှင့် တိပိဋက ရွေးချယ်ရေး အဖွဲ့ဝင် လူကြီး၊ နှင်းဆီကုန်း ဘိုးဘွား စောင့်ရှောက်ရေး အဖွဲ့ဝင် လူကြီး။
၁၀။ ၁၉၃၈ - ၃၉ ဦးအောင်ဆန်း [B.A] အမျိုးသား ခေါင်းဆောင်ကြီး။
၁၁။ ၁၉၃၈ - ၃၉ ဦးဗဟိန်း ကွန်လွန်သူ ကျောင်းသား ခေါင်းဆောင်၊ ဗကသများ အဖွဲ့ချုပ် ဥက္ကဌ၊ ဖက်ဆစ် ဆန့်ကျင်ရေး တိုက်ပွဲတွင် ကွန်မြူနစ် ပါတီဝင်၊ ဖဆပလ ဗဟို အလုပ်အမှုဆောင်။
၁၂။ ၁၉၃၉ - ၄၀ ဦးလှရွှေ (ဒေါက်တာ လှရွှေ)
၁၃။ ၁၉၄၀ - ၄၁ ဦးဗဆွေ ဗကသများ အဖွဲ့ချုပ် အတွင်းရေးမှူး၊ ဖက်ဆစ် ဆန့်ကျင်ရေး တိုက်ပွဲတွင် ဆိုရှယ်လစ် ပါတီဝင်၊ ဖဆပလ ဗဟို အလုပ်အမှုဆောင်၊ ဝန်ကြီးချုပ်ဟောင်း။
၁၄။ ၁၉၄၁ - ၄၂ ဦးလှမောင် သံအမတ်ကြီးဟောင်း။
၁၅။ ၁၉၄၅ - ၄၆ ဦးသန်း။
၁၆။ ၁၉၄၆ - ၄၇ ဦးသန်းမောင် မန္တလေး သူရိယ သတင်းစာ အယ်ဒီတာ။
၁၇။ ၁၉၄၇ - ၄၈ ဦးစိန်လှ လွှတ်တော် ရှေ့နေကြီး။
၁၈။ ၁၉၄၈ - ၄၉ ဦးရန်ဝေး မကွေးခရိုင်၊ ဖဆပလ။
၁၉။ ၁၉၄၉ - ၅၀ ဦးမောင်မောင်ကျော် တက္ကသိုလ် ကောင်စီလူကြီး၊ ကျောင်းသား ကိုယ်စားလှယ်။
၂၀။ ၁၉၅၀ - ၅၁ ဦးကိုကိုလေး ရန်ကုန် မြူနီစီပယ် ပြည်သူ့ ဆက်ဆံရေး အရာရှိ။
၂၁။ ၁၉၅၁ - ၅၂ ဦးစိန်သန်း နိုင်ငံတော် စိုက်ပျိုးရေး ဘဏ်ရုံးချုပ် မန်နေဂျာ။
၂၂။ ၁၉၅၂ - ၅၃ ဦးကိုကိုကြီး ဝင်ကုန် ထွက်ကုန် ကုည်သည်ကြီး။
၂၃။ ၁၉၅၄ - ၅၅ ဦးတင်ထွန်း ပဲခူး နိုင်ငံတော် ကူးသန်း ရောင်းဝယ်ရေး ဘဏ် လက်ထောက် မန်နေဂျာ။
၂၄။ ၁၉၅၅ - ၅၆ ဦးတင်ထွန်း နတ်မောက် ပမညတ။
၂၅။ ၁၉၅၆ - ၅၇ ဦးစသိန်းဟန် တပ်မတော် ပညာရေးနှင့် စိတ်ဓာတ်ရေးရာ ဌာန။
၂၆။ ၁၉၅၇ - ၅၈ ဦးစိုးသိန်း [B.A.]
၂၇။ ၁၉၅၉ - ၆၀ ဦးခင်မောင်အုန်း ဗကသများ အဖွဲ့ချုပ် ဥက္ကဋ္ဌ။
၂၈။ ၁၉၅၉ - ၆၀ ဦးလှတင့်။
၂၉။ ၁၉၆၀ - ၆၁ ဦးတင်အေး [B.A] တရားရုံး ရှေ့နေချုပ်။
၃၀။ ၁၉၆၁ - ၆၂ ဦးဗဆွေလေး။
Chairmen of the University Students’ Union (1930 - 1962)
1. 1930-31 U Kyaw Khin [B.Sc., B.L.] Advocate
2. 1931-32 U Tun Sein [B.Sc., B.L.] Advocate
3. 1931-32 U Boe Ku - D.S.I (3) Manager
4. 1932-33 U San Phaw Aung [B.A., B.L] Steel Brothers Import Export Manager
5. 1933-34 U Thein Maung [B.A., B.L] Steel Brothers Rice Mail Manager
6. 1934-35 U Pho Aye [B.Sc.Hons. (Rng.), Ph.D. (London). D.I.C.F.R. Meteorology (London) Director Meteorology
7. 1935-36 U Nu [B.A] Former Prime Minister
8. 1936-37 U Rashit [B.Sc., B.L] Former Minister
9. 1937-38 U Ba Jum [B.A, B.L.] Former Minister
10. 1938-39 U Aung San [B.A] National Hero
11. 1938-39 U Ba Hein - Students Leader; ABFSU Chairman; During the Anti-Fascist Battle, Communist Party Member; AFPFL, CEC Member.
12. 1939-40 U Hla Shwe (Dr. Hla Shwe)
13. 1940-41 U Ba Swe - ABFSU Scretary; During the Anti-Fascist Battle, Socialist Party Member, AFPFL CEC Member,
14. 1941-42 U Hla Maung - Former Embassador
15. 1945-46 U Than
16. 1946-47 U Than Maung - Editor-Mandalay Sun Newspaper.
17. 1947-48 U Sein Hla - Advocate
18. 1948-49 U Yan Way - Mague District AFPFL
19. 1949-50 U Maung Maung Kyaw - University Council Member; Student Representative
20. 1950-51 U Ko Ko Lay - Rangoon Municipal Public Relation Manager
21. 1951-52 U Sein Than - Agricultural Bank Manager
22. 1952-53 U Ko Ko Gyi - Import Export Marchant.
23. 1954-55 U Tin Tun - Deputy Manager - State Commercial Bank (Pegu)
24. 1955-56 U Tin Tun - NUF Natmauk
25. 1956-57 U S. Thein Han - Military Science and Psychological Warfare Department
26. 1957-58 U Soe Thein [B.A.]
27. 1959-60 U Khin Maung Ohn - ABSFU Chairman
28. 1959-60 U Hla Tint
29. 1960-61 U Tin Aye [B.A.] Advocate
30. 1961-62 U Ba Swe Lay
အတကသကို ဤသို့ စခဲ့ကြသည်
ရန်ကုန် တက္ကသိုလ် ကျောင်းသားများ သမဂ္ဂ တည်ထောင်စ အချိန် ကပင်၊ ကျောင်းသားများ အားလုံး အတွက်၊ အသင်းအပင်း တခု ရှိသင့် ကြောင်းကို အများက စိတ်ကူး ပေါက်ခဲ့ ကြသည်။ သို့သော် ၁၉၂၆ ခုနှစ် အထိ အကောင်အထည် ပေါ်၍ မလာ ခဲ့ပေ။ ထိုအချိန်က အဓိပတိ ဖြစ်သော၊ ဆာဟာကုတ် ဘတ်တလာ (Sir Harcout Butler, G.C.I.G, I.C.S) ၏ မေတ္တာ ရပ်ခံချက် အရ၊ ဒေါက်တာ ဦးညို (K.S.M,L.L.D) သည် တက္ကသိုလ် ကျောင်းသားများ သမဂ္ဂ ဖြစ်မြောက်ရေး အတွက်၊ ငွေသား တသိန်း ခုနစ်သောင်း ကျပ်ကို ၁၉၂၆ ခုနှစ်တွင် စေတနာ ထက်သန်စွာ လှူဒါန်း ခဲ့ပေသည်။
၁၉၂၆ ခုနှစ်တွင် သမဂ္ဂ အဆောက်အဦ စတင် ဆောက်လုပ် ခဲ့ရာ၊ ၁၉၃၀ ခုနှစ် အလယ်ပိုင်းလောက်တွင် ပြီးမြောက်ခဲ့ပေသည်။
သမဂ္ဂ အဆောက်အဦကြီး ပြီးစီး ပြီးနောက်၊ ၁၉၃၀ ခု စက်တင်ဘာ လဆန်းတွင် တက္ကသိုလ် ကျောင်းသားကြီး များသည် မိမိတို့ အချင်းချင်း ဆွေးနွေး ကြပြီးနောက် ကျောင်းဆောင် အများအပြားတွင်၊ ကျောင်းဆောင်နေ ကျောင်းသား များ၏ အစည်းအဝေးကို ခေါ်ယူ ခဲ့ပေသည်။ နေ့ ကျောင်းသား များကိုလည်း မြို့ထဲတွင် အစည်းအဝေးများ စီစဉ် ကျင်းပ ခဲ့ပေသည်။ ၎င်း အစည်းအဝေး များ၏ တညီတညွတ်တည်း ဆုံးဖြတ်ချက် အရ၊ ၁၉၃၀ ခု စက်တင်ဘာလ ၁၂ ရက် (သောကြာနေ့) တွင်၊ ကိုကျော်ခင် ( ဝိဇ္ဇာသိပ္ပံ) ကိုတင့်ဆွေ (ဝိဇ္ဇာ) နှင့် ကိုဘဂျမ်း (ဂျင်ဆင်) တို့သည်၊ ထို အချိန်က ကိုယ်စား ဒုအဓိပတိ ဖြစ်သော တရားသူကြီး ဦးဘအား သွားရောက် တွေ့ဆုံ ဆွေးနွေး ကြပြီး၊ ၎င်းထံမှ သမဂ္ဂ စည်းမျဉ်း ရေးဆွဲရန် ကော်မတီ ဖွဲ့စည်းခွင့် ရခဲ့ ပေသည်။
၁၉၃၀ ခု စက်တင်ဘာလ ၂၀ ရက် (စနေနေ့)တွင်၊ ကျောင်းသားထု စည်းဝေးပွဲကြီး တရပ်ကို တက္ကသိုလ် အားကစား ရုံသစ်ကြီးတွင် ကျင်းပ ခဲ့သည်။ ကိုကျော်ခင် (ဝိဇ္ဇာ သိပ္ပံက) သဘာပတိ အဖြစ် ဆောင်ရွက် ခဲ့သည်။ တက္ကသိုလ် ကျောင်းသား အများအပြား တက်ရောက်သော ယင်း အစည်းအဝေး ကြီးမှ တက္ကသိုလ် ကျောင်းသားများ သမဂ္ဂ တခု ဖွဲ့စည်းရန် ဆုံးဖြတ် ခဲ့ပေသည်။ ဒေါက်တာ ဦးညိုအား ၎င်း၏ စေတနာ ထက်သန်စွာ လှူဒါန်းမှု အတွက် ကျေးဇူး တင်ရှိကြောင်း၊ သမဂ္ဂ အဆောက်အဦ အတွက် လုံလောက်မှု မရှိခြင်းကြောင့် ကျေနပ်ခြင်း မရှိကြောင်း မှတ်ချက် ချခဲ့ကြ ပေသည်။ ၎င်း အစည်းအဝေးကြီး ကပင် သမဂ္ဂ စည်းမျဉ်း ရေးဆွဲရေး အတွက် ကော်မတီ တရပ် ဖွဲ့စည်း ခဲ့ပေသည်။
အောက်တိုဘာလ ကျောင်းပိတ်ရက် အတွင်းတွင် ထိုကော်မတီသည် စည်းမျဉ်း ရေးဆွဲ ခဲ့ရာ နိုဝင်ဘာလတွင် ပြီးစီး အောင်မြင် ခဲ့ပေသည်။ ၁၉၃၀ ခု နိုဝင်ဘာလ ၂၄ ရက်နေ့တွင် လက်မှတ် ရေးထိုး ခဲ့ပေသည်။ ကော်မတီသည်၊ ၎င်း၏ အစီရင် ခံစာကို၊ ကျောင်းသားထု စည်းဝေးပွဲသို့ မတင် ပြမီ တက္ကသိုလ်နှင့် ကျောင်းသားထု ထံမှ မှတ်ချက်နှင့် ဝေဖန်ချက်များ တောင်းခံ ခဲ့ပေသည်။
၁၉၃၀ ခု ဒီဇင်ဘာလ ၁၇ ရက် (ဗုဒ္ဓဟူးနေ့) တွင် တက္ကသိုလ် ဒုအဓိပတိ ဆာ ဘင်ဂျာမင် အိပ်ခ်ျဟီးလ် (Sir Benjamin H.Heald Kt, M.A,I.C.S) က ကော်မတီ၏ ကိုယ်စားလှယ် များနှင့် တကွ၊ ကောလိပ် များမှ ကျောင်းအုပ်ကြီး များအား စည်းဝေးပွဲ တရပ် ဖိတ်ခေါ်ကာ ထို အစည်းအဝေးတွင် စည်းမျဉ်း ဥပဒေ၏ အဓိက မူကို မထိခိုက်သော ပြောင်းလဲချက် အချို့ကို ပြုလုပ်ရန် အကြံ ပေးခဲ့ ပေသည်။ ကော်မတီသည် ကျောင်းသား အချို့ ထံမှ မှတ်ချက်များ လက်ခံ ရရှိကာ စဉ်းစား ခဲ့ပေသည်။ ထို ရရှိသော မှတ်ချက်နှင့် ဝေဖန်ချက်များ အရ၊ ကော်မတီသည် စည်းမျဉ်း ဥပဒေ မူကြမ်း ပေါ်တွင် အချို့သော မွမ်းမံချက် များကို ပြုလုပ် ခဲ့ပေသည်။ ထို မွမ်းမံပြီး မူကြမ်းကို၊ ၁၉၃၀ ခုနှစ် ဇန်နဝါရီလ ၉ ရက်နေ့တွင် ကိုသိန်းမောင် (ဂျပ်ဆင်) က သဘာပတိ အဖြစ် ဆောင်ရွက်သော ကျောင်းသားထု စည်းဝေးပွဲသို့ တင်ပြရာ၊ ထို စည်းဝေးပွဲကြီးက တညီတညွတ်တည်း သဘောတူ လက်ခံ ခဲ့လေသည်။
ထို အစည်းအဝေးမှ ၉ ဦး ပါဝင်သော အလုပ်အမှုဆောင် အဖွဲ့ကို ရွေးကောက် ခဲ့ပြီး၊ ၉ ဦး ကော်မတီဝင် များက အမှုဆောင် တာဝန် များကို ခွဲဝေ ယူကြရန် အာဏာ အပ်နှင်း ခဲ့ပေသည်။ ကော်မတီသည် သမဂ္ဂ အဆောက်အဦနှင့် ပတ်သက်သော ကိစ္စရပ်များ အပြင်၊ သမဂ္ဂ၏ ကိုယ်စား၊ စည်းမျဉ်း ဥပဒေ များကို ဆက်လက် ရေးဆွဲရေးနှင့် ပတ်သက် ၍လည်း၊ တက္ကသိုလ် အာဏာပိုင် များနှင့် စေ့စပ် ဆွေးနွေးရန်၊ အခွင့် အာဏာများ ရှိပေသည်။ ဤ နေရာတွင် ဖော်ပြရန် လိုအပ် သည်မှာ သမဂ္ဂနှင့် တက္ကသိုလ် အာဏာပိုင်တို့ အကြား တင်ပြ ထားသော သဘော တူညီချက် မူကြမ်းကို၊ တက္ကသိုလ် ကောင်စီ၏ အလုပ်အမှုဆောင် အစည်းအဝေးတွင် တင်သွင်း ဖတ်ကြား ခဲ့သည်။ အစည်းအဝေးတွင် ပြောဆို ကြသော မိန့်ကြားချက်များ အရ၊ ကျောင်းသားများ ဘက်မှ ထို မူကြမ်းကို လက်ခံရန် စိတ်ပါ ဝင်စားမှု မရှိကြ သည်မှာ၊ ယုံမှား စရာ မရှိပေ။ ထို အချက်သည် အမှုဆောင် အဖွဲ့အား၊ စည်းမျဉ်း ဥပဒေနှင့် ကိုက်ညီ မှသာ၊ ဆက်လက်၍ စေ့စပ် ဆွေးနွေးရန်နှင့် သဘော တူညီချက်ကို မွမ်းမံ လက်ခံရန် အာဏာ အပ်နှင်း ထားခြင်း၏ အဓိက အကြောင်းရပ် ဖြစ်ပေသည်။
တက္ကသိုလ်မှ တင်ပြသော အချို အချက်အလက် များသည်၊ သမဂ္ဂ၏ စည်းမျဉ်း ဥပဒေနှင့် ဆန့်ကျင် နေသောကြောင့် စေ့စပ် ဆွေးနွေးရာတွင် အခက်အခဲများ ပေါ်ပေါက် လာခဲ့သည်။ အဓိက ကွဲလွဲချက်မှာ၊ တက္ကသိုလ် ကျောင်းသား ဟောင်းများနှင့် ဘွဲ့ရ ကျောင်းသား များအား သမဂ္ဂဝင် အဖြစ် လက်ခံရန်၊ တက္ကသိုလ်မှ သဘော မတူ ဟူသော အချက်ပင် ဖြစ်သည်။ စေ့စပ် မရနိုင် လောက်အောင် ဖြစ်နေသော ကွဲလွဲချက်ကို၊ သမဂ္ဂ အမှုဆောင် အများနှင့် ဒု အဓိပတိတို့ အကြိမ်ပေါင်း များစွာ တွေ့ဆုံ ဆွေးနွေးခြင်းဖြင့် ပြေလည် စေနိုင် ခဲ့ပေသည်။ ဤကိစ္စနှင့် ပတ်သက်၍ ၊ ဝတ်လုံတော်ရ ဦးစိုးညွန့် (M.A, M.L.C) နှင့် တက္ကသိုလ် ကောင်စီ လူကြီး၊ အလုပ် အမှုဆောင်ဝင် အချို့ တို့က အဖိုး အနဂ္ဃ ထိုက်တန် လှသော အကူအညီများ ပေးခဲ့ ကြပေသည်။ နောက်ဆုံးတွင်၊ သဘော တူညီမှု အချက်အလက် များကို၊ ၁၉၃၁ ခု၊ ဖေဖော်ဝါရီလ ၂၇ ရက်နေ့တွင် ကျင်းပသော သမဂ္ဂ အလုပ် အစည်းအဝေးမှ မူအားဖြင့် လက်ခံပြီး၊ သမဂ္ဂ အမှုဆောင် များနှင့် တက္ကသိုလ် အာဏာပိုင် တို့သည် သဘော တူညီမှု ရခဲ့ ပေသည်။ ယင်း သမဂ္ဂ အလုပ် အစည်းအဝေး ပွဲတွင် ဖော်ပြပါ သဘော တူညီမှု အချက်အလက် များနှင့် ကိုက်ညီ စေရန် အချို့သော စည်းမျဉ်း ဥပဒေ ပြင်ဆင်ချက်များ လက်ခံ အတည်ပြု ခဲ့ပေသည်။ ထို သဘော တူညီချက်ကို၊ ၁၉၃၁ ခုနှစ်၊ ဖေဖော်ဝါရီလ ၂၈ ရက်နေ့ နံနက် ၁၁ နာရီ အချိန်တွင်၊ သမဂ္ဂ အမှုဆောင် များက လက်မှတ် ရေးထိုး ခဲ့ပေသည်။
ပြင်ဆင်ပြီး ဖြစ်သော စည်းမျဉ်း ဥပဒေသည်၊ ၁၉၃၁ ခုနှစ် ဖေဖော်ဝါရီ ၂၇ ရက်နေ့ အလုပ် အစည်းအဝေး ကြီးမှ ပြင်ဆင် အတည် ပြုသော စည်းမျဉ်း ဥပဒေပင် ဖြစ်သည်။ သို့သော် ဤ စည်းမျဉ်း ဥပဒေသည် အခြေခံ အားဖြင့် မူလ စည်းမျဉ်း ဥပဒေနှင့် ခြားနားခြင်း မရှိပေ။ စည်းမျဉ်း ရေးဆွဲရေး ကော်မတီ၏ ပြောကြားချက် အရ၊ ကျောင်းသားများ အပေါ်လုံးဝ အားထား ပိုင်ခွင့်သည် စည်းမျဉ်း ဥပဒေ၏ သော့ချက်ပင် ဖြစ်ကြောင်း ပါရှိပေသည်။ သမဂ္ဂသည်၊ အနာဂတ် မြန်မာ နိုင်ငံ သားများ၏ ကိုယ်စားလှယ် အဖွဲ့ တဖွဲ့ ဖြစ်သည်နှင့် အညီ တက္ကသိုလ် ကျောင်းသား များအား နိုင်ငံတော်၏ အကျိုး အတွက် ထမ်းရွက် ကြစေရန်၊ လွတ်လပ်ရေး စိတ်ဓာတ် သွင်းပေးရန်နှင့် တာဝန်သိ စိတ်ဓာတ်များ ဖန်တီး ပေးရန် ကြိုးပမ်း သွားမည် ဖြစ်သည်။ သမဂ္ဂသည် လူမှုရေး လုပ်ငန်းများ စီစဉ် ပေးခြင်း၊ မိတ်ဆက် တွေ့ဆုံပွဲများ စီစဉ် ပေးခြင်း၊ စားသောက်ဆိုင်များ ထားရှိ ပေးခြင်းနှင့် အိမ်တွင်း ကစားခုန်စား လုပ်ငန်းများ စည်ရုံး ပြုလုပ်ခြင်းများ ပြုလုပ် ရသည်မှာ သံသယ ဖြစ်ဖွယ် အကြောင်း မရှိပေ။ သို့ရာတွင်၊ သမဂ္ဂ၏ အနာဂတ် ဝါဒ ရည်ရွယ်ချက် တရပ်လုံး၏ အခြေခံ အချက် တချက်မှာ၊ တက္ကသိုလ် ကျောင်းသား များအား၊ တက္ကသိုလ် ကျောင်းမှ ထွက်ခွာ၍ ပိုမို ကျယ်ပြန့်သော လူ့လောက အတွင်းသို့ ဝင်ရောက် ကြသည့် အခါတွင်၊ ထို ကျောင်းသား များအား အနာဂတ် လူ့ဘောင်နှင့် ကိုယ်ရေး ကိုယ်တာ ဆိုင်ရာ ဘဝ တလျှောက်လုံး အတွက် ပြင်ဆင်မှုများ ပြုလုပ် ပေးရန်ပင် ဖြစ်သည်။ အနာဂတ် တက္ကသိုလ် ကျောင်းသား များသည်၊ သမဂ္ဂ၏ မွန်မြတ်သော လုပ်ငန်းများ အတွက် မှတ်ယူကာ၊ သမဂ္ဂ၏ မွန်မြတ်သော အသင်းဝင် ဖြစ်ခြင်းနှင့် လုပ်ငန်း များကို လုပ်ဆောင် ရခြင်း အတွက် မည်သည့် အခါမျှ မေ့ပျောက် နိုင်ကြ လိမ့်မည် မဟုတ် မြော်လင့် မိပေသည်။ သမဂ္ဂ၏ အသင်းဝင် ဖြစ်ရခြင်း လုပ်ငန်းများ ပါဝင် ဆောင်ရွက် ရခြင်းသည်၊ အမိ နိုင်ငံတော်၏ လူထု လုပ်ငန်း၊ လူမှုရေး၊ နိုင်ငံရေးနှင့် ပညာရေး လုပ်ငန်း များတွင် ပါဝင် လုပ်ဆောင် နိုင်ရန် အတွက်၊ လေ့ကျင့်ခြင်းပင် ဖြစ်ပေသည်။
တက္ကသိုလ် သမဂ္ဂသည် ကောလိပ် များထက် ပိုမို ကျယ်ပြန့်သော၊ လူထု သဘောထား တရပ်ကို တင်ပြ နိုင်လိမ့်မည် ဖြစ်သည်။ သမဂ္ဂ တခုသည်၊ လွတ်လပ်စွာ တွေးတော ကြံဆခြင်းနှင့် လွတ်လပ်စွာ ထုတ်ဖော် ပြောဆိုခြင်း အတွက် ရပ်တည် နေခြင်းပင် ဖြစ်သည်။ ပြည့်ဝသော လွတ်လပ်စွာ ထုတ်ဖော် ပြောဆိုမှု အခွင့်အရေးကို ၊ သမဂ္ဂမှ တောင်းဆို ရရှိ လိမ့်မည်ဟု ကျွန်တော် မြှော်လင့် ပါသည်။ သို့ရာတွင် သမဂ္ဂ၏ တိုးတက်ရေး၊ အောင်မြင်စွာ စည်းရုံနိုင်ရေး၊ သြဇာ တိက္ကမ ကြီးထွား လာရေးတို့ အတွက်၊ လွတ်လပ်မှုကို ကျင့်သုံးခြင်းနှင့် တာဝန်သိ စိတ်များ ထားရှိရန် လိုအပ် လှပေသည်။
စည်းမျဉ်း ရေးဆွဲရေး ကော်မတီ၏ အစီရင် ခံစာတွင် တက္ကသိုလ် အာဏာပိုင် များအား၊ ကျောင်းသား များ၏ အကျိုးနှင့် ပတ်သက်သော ပြဿနာ များတွင် သမဂ္ဂနှင့် ၎င်း၏ အမှုဆောင် များအား ယုံကြည် ကိုးစားစွာဖြင့် တိုင်ပင်ရန် ဖော်ပြ ထားပေသည်။
သမဂ္ဂ၏ လုပ်ငန်း များကို၊ မြန်မာ ပြည်သူများ ထဲမှ ပုဂ္ဂိုလ် များသည်လည်း မျက်ခြေ မပြတ် သင့်လှပေ။ ထို ပုဂ္ဂိုလ် များအား အစည်းအဝေး များတွင် မိန့်ခွန်း ပြောကြားရန် သမဂ္ဂမှ မေတ္တာ ရပ်ခံသည့် အခါ၊ ကျောင်းသား များအား အရေးကြီးသော အမျိုးသားရေး ပြဿနာ များနှင့် ပတ်သက်၍ အသိပေး မိန့်ခွန်း စကား ပြောကြား သင့်ပေသည်။ အင်္ဂလန် ပြည်၏ လူထု လောက ထဲတွင် ထင်ရှားသော ရှေ့တန်း ပုဂ္ဂိုလ် တဦး တယောက်သည်၊ အယူအဆ မည်သို့ပင် ရှိစေကာမူ၊ အောက်စဖို့ဒ် သို့မဟုတ် ကင်းဘရစ်ခ်ျ တက္ကသိုလ် သမဂ္ဂ များတွင် မိန့်ခွန်း မပြောသူ မရှိ သလောက် ဖြစ်ပေသည်။ အလား တူစွာပင် ကျွန်ုပ်တို့၏ သမဂ္ဂသည် ပါတီ အသီးသီးမှ ခေါင်းဆောင် များ၏ အတွေ့အကြုံ များကို ကြားနာ သိခွင့် ရလိမ့် မည်ဟု မြှော်လင့် ရပေသည်။
သမဂ္ဂသည် ပေါ်ပေါက် နေသော ပြဿနာ ရပ်များနှင့် ပတ်သက်၍ တင်ပြ လာသော အယူအဆ အသီးသီးကို၊ ကောင်းစွာ ကြိုဆိုမည် ဖြစ်သည်။ ထိုနောက် လွတ်လပ်စွာ ဆုံးဖြတ် လုပ်ဆောင်မည် ဖြစ်သည်။
နိုင်ငံ တနိုင်ငံ၏ လူငယ် များသည် ထို နိုင်ငံ၏ အနာဂတ်ကို ပိုင်ဆိုင်သည် သာမက၊ ၎င်းတို့၏ စိတ်ဓာတ် သည်လည်း ယင်း နိုင်ငံရှိ အမျိုးသားရေးနှင့် မျိုးချစ် စိတ်ဓာတ် တို့၏ အခြေခံပင် ဖြစ်သည်။ ၎င်းပြင် ထို နိုင်ငံရှိ နိုင်ငံရေး အဆောက်အအုံ၏ ကြံ့ခိုင်ခြင်းနှင့် အားနည်းခြင်း တို့သည်လည်း အဆိုပါ စိတ်ဓာတ် အခြေခံ၌ တည်နေ ပေသည်။ ထို့ကြောင့် ကျွန်ုပ်တို့ နိုင်ငံ ကဲ့သို့သော သူတပါး လက်အောက်ခံ နိုင်ငံ တနိုင်ငံတွင်၊ လူငယ်တို့၏ စိတ်ဓာတ်ကို ကြံ့ခိုင် စေရန် အလို့ငှာ၊ ကြိုးပမ်း မွမ်းမံ ပေးရန် လိုအပ် ပေသည်။ ကျွန်တော် တို့သည် တက္ကသိုလ် ကျောင်းသားများ ဖြစ်ကြပြီး၊ မြန်မာ နိုင်ငံ ပညာတတ် လူတန်းစား များ၏ အစိပ်အပိုင်းကြီး တရပ် ဖြစ်သည့် အားလျော်စွာ၊ တိုင်းပြည်မှ အရေးတကြီး လိုအပ်ချက် များကို မမေ့သင့် ကြပေ။ ကျွန်တော်တို့၏ ကိုယ်ရေး ကိုယ်တာ ကိစ္စရပ် များကို အလေးဂရု ပြုကြ ရမည် ဖြစ်သော်လည်း၊ အမိ နိုင်ငံတော်က၊ ၎င်း၏ သားသမီး များအား၊ ၎င်းတို့၏ ဘဝ လုပ်ငန်း များနှင့် အမိ နိုင်ငံတော်၏ အကျိုး အတွက်၊ အမြဲတစေ စိတ်ပါ ဝင်စား ပြောဆို လုပ်ကိုင် နေထိုင်ခြင်းနှင့် အမိ နိုင်ငံ၏ ဂုဏ်သိက္ခာကို အမြဲ တစေ မြှင့်တင် ပေးရ မည်ဟု ထင်မြင် နေပါက မြှော်လင့်ချက် လွန်ကဲရာ ကျနေ လိမ့်မည်လော။ ကျွန်တော် တို့သည် အမိ နိုင်ငံ၏ ယဉ်ကျေးမှုနှင့် ဓလေ့ ထုံးစံ တို့ကို ထိန်းသိမ်းရန် တာဝန် ရှိကြောင်း သတိ ချပ်သင့် လှပေသည်။ ကျွန်တော် တို့၏ သန့်စင် မှန်ကန်သော အမျိုးသားရေး ပုံသဏ္ဍာန်ကို ထိန်းသိမ်းရန် စွဲစွဲမြဲမြဲ ခံယူ ထားသင့် ပေသည်။ မလိုလား အပ်သော နိုင်ငံခြား ပယောဂ လွှမ်းမိုးမှု များအား စိတ်ဝင်စားခြင်း သို့မဟုတ် အမျိုးသား ပုံသဏ္ဍန် ပပျောက် စေမည့် ယိမ်းယိုင် စေမှု မှန်သမျှအား လုပ်ကြံမှု တရပ် အဖြစ် မှတ်ယူ ရမည် ဖြစ်သည်။ ကျွန်တော် တို့သည် ထမ်းရွက်ရန် ကျရောက် လာသော တိုင်းပြည်၏ ဂုဏ်သိက္ခာ မြှင့်တင်ရေး၊ လွတ်မြောက်ရေးနှင့် ရှေးဟောင်း အောင်မြင်မှု များကို ထိန်းသိမ်းနိုင်ရေး အတွက်၊ မျက်ခြေ မပြတ် သင့်ကြပေ။ အမိ မြန်မာ နိုင်ငံတော်သည် ၎င်း၏ နုနယ်သော သားပျို သမီးပျို များအား အနာဂတ်၏ မီးရှူး တန်ဆောင် သဖွယ် မှတ်ယူလျက် ရှိပေသည်။ အမိ နိုင်ငံ အတွက် ကိုယ်ကျိုး မစွန့်ဝံ့သူ မှန်သမျှသည် ကြောက်ရွံ့ သူများသာ ဖြစ်သည် မဟုတ်လော။
သမဂ္ဂ အသင်းဝင် များသည် အနာဂတ် ဗမာပြည်၏ အကျိုး အတွက် ကြီးမားသော အခန်း ကဏ္ဍမှ မလွဲမသွေ ပါဝင် ထမ်းရွက် ရမည် ဖြစ်သည်။ ထို့ကြောင့်၊ ကြီးမားသော အောင်ပွဲ အတွက်၊ ကျွန်တော် တို့သည် စည်းလုံး ညီညွတ် ကြပါစို့။ သမဂ္ဂ၏ အကျိုး အတွက် လုပ်ဆောင် ရမည့် လုပ်ငန်း များနှင့် ရင်ဆိုင် နေရသည့် အခါ များတွင် တွေဝေ ယိမ်းယိုင်မှု များအား၊ မှန်ကန် တရား မျှတသော ဆုံးဖြတ်ချက် များဖြင့် ဖယ်ရှား ပစ်နိုင် ပါစေ။ သမဂ္ဂကြီး အဓွန့်ရှည် တည်တန့် ပါစေ။ သမဂ္ဂသည် မြန်မာ ပြည်သူများ အကြားတွင် ခိုင်မာစွာ ရပ်တည် နိုင်ပါစေ။
အမ်အေ ရာရှစ်
အထွေထွေ အတွင်းရေးမှူး။
(ဇန်နဝါရီ - ဇွန် ၁၉၃၁)
ရန်ကုန် တက္ကသိုလ် ကျောင်းသားများ သမဂ္ဂ
ရန်ကုန်။
ဇွန်လ ၁ ရက်၊ ၁၉၃၁ ခု။
[အိုးဝေ နှစ်လည်စာစောင်၊ ၁၉၆၀]
ကိုးအကား
၁။ ‘ကိုလိုနီခေတ် မြန်မာ့ သမိုင်း အဘိဓာန်’ - မြဟန်၊ ၂၀၀၀ ခုနှစ် တတိယ အကြိမ်ထုတ်၊ တက္ကသိုလ်များ သမိုင်း သုတေသန ဌာန၊ ဂျီအီးစီ (ပညာရေး) သမဝါယမ အသင်း။
၂။ Weekly Eleven News ကွန်ရက်စာမျက်မှ ‘မြန်မာ့ လွတ်လပ်ရေး၏ အမြုတေ (သို့မဟုတ်) အမျိုးသားနေ့’ အကြောင်း တင်ပြချက်၊ www.weeklyeleven.com
၃။ ‘ပြည်ထောင်စု မြန်မာနိုင်ငံ သမိုင်းဝင် စာချုပ် စာတမ်းများ’ - ရဲဘော် လှမျိုး၊ နံသာတိုက်၊ ပထမအကြိမ်၊ ၁၉၆၈။
၎။ ‘အမျိုးသားနေ့ ဥဒါန်း’၊ အတွေးအမြင် စာစဉ် ၁၀၆၊ ၁၉၉၄၊ ဒီဇင်ဘာ။
http://usuburma.co.cc/?p=76 blog မှ
